 |
Jumat, 26 Agustus 2011
Amaliah Ramadlan
الحمد
لله الذى أنعمنا بنعمة الإيمان والإسلام. والصلاة والسلام على سيدنا محمد
خيرالأنام وعلى آله وأصحابه وتابعيه على الدوام. أشهد أن لا إله إلاالله وحده لا
شريك له وأشهد أن سيدنا محمدا عبده ورسوله لا نبي بعده. أما بعد، فيا عباد الله
أوصينى نفسى وإياكم بتقوى الله فقد فاز المتقون، وقال الله تعالى: وَلَا يَحْسَبَنَّ الَّذِينَ يَبْخَلُونَ بِمَا
آتَاهُمُ اللَّهُ مِنْ فَضْلِهِ هُوَ خَيْرًا لَهُمْ بَلْ هُوَ شَرٌّ لَهُمْ
سَيُطَوَّقُونَ مَا بَخِلُوا بِهِ يَوْمَ الْقِيَامَةِ وَلِلَّهِ مِيرَاثُ
السَّمَاوَاتِ وَالْأَرْضِ وَاللَّهُ بِمَا تَعْمَلُونَ خَبِيرٌ
Hadirin sidang Jum’at Rohimakumulloh.
Kirang langkung tilu dinten deui kapayun, saupami Allah ngersakeun urang
panjang yuswa, urang tiasa keneh sasarengan sareng sasih anu mulya, sasih
Ramadlan. Nanging sasih ieu dina etangan
singket bakal mungkur sareng ngantunkeun
urang digentos ku sasih syawal. Kumargi sakitu sesa-sesa dinten anu akhir ieu
sumangga urang intensifkeun sareng optimalkeun ku amaliah-amaliah utami Ramadlan,
sahingga urang tiasa ngaraih saseueur-seueurna kasaean sasih ieu, margi saha
anu tiasa ngajamin yen dina Ramadlan taun payun yuswa urang masih keneh
dipanjangkeun? Ningkatkeun produktifitas amal kasaean dina mangsa-mangsa anu
bade seep diharepkeun tiasa ngajantenkeun runtuyan sadaya amal urang
ditungtungan ku kaayaan anu sae, anu dina istilah kahirupan disebat “husnul
khotimah” . Malahmandar tung-tung anu sae eta tiasa janten simbol kana
ditampina amal-amal kasaean urang ku Allah SWT.
Utamina deui amaliah-amaliah eta tiasa nganterkeun urang kana darajat muttaqin.
Amaliah-amaliah Ramadlan, sakumaha sering dijelaskan ku para ulama,
sanes wungkul shaum, tarawih, qiyamullail, tilawatul qur’an, sareng I’tikaf,
nanging oge infaq, shadaqah, ith’amuth tha’am (masihan tuangeun),
wakaf sareng zakat. Upami shaum, tarawih, qiyamullail, tilawatul
qur’an, sareng I’tikaf langkung nekenkeun kana produktifitas kasolehan
individual, maka infaq, shadaqah, ith’amuth tha’am, wakaf sareng zakat
langkung ageung kaitanana sareng produktifitas & aktifitas ibadah maliyah
anu ngalahirkeun kasolehan sosial. Dua dimensi ibadah ieu sami-sami janten unggulan amaliah Ramadlan, anu kedah
diperhatoskeun sareng dilaksanakeun sacara saimbang.
Patali sareng Ibadah sosial ieu, Ramadlan janten sasih santunan nalika jalmi-jalmi anu iman
sadar, yen shaumna ngadidik maranehanana sangkan ngamilik empati
ka fakir-miskin, ku ngaraoskeun lapar sareng hanaang sakumaha anu diraoskeun ku maranehanana. Kumargi kitu, urang salayakna janten jalmi berean
sareng bageuran dina sasih Ramadlan, dimana kabageuran ieu tiasa
diraoskeun manfaatna ku kaseseueuran jalmi. Agama Islam
parantos nanjeurkeun kawajiban anu janten salah sawios pilar agama nyaeta zakat. Salah sawios nilai substansial
anu napel dina kawajiban ngalaksanakeun zakat ieu nyaeta nilai kabageuran
sareng kaberpihakan ka kaum dhuafa. Rizki sareng pitulung Allah bakal sumping
nalika urang ngalaksanakeun pembelaan kana kapentingan kaum dhuafa. Numutkeun sunnatullah, sikep pedit sareng mentingkeun
diri nyalira sok nyandak kana kareksakan, sanes wungkul dina tatanan kahirupan
pribadi sareng kulawargi, nanging oge dina kasaimbangan kahirupan masyarakat,
bangsa sareng nagara. Ku kecap sanes, aya korelasi antawis kasajahtraan sareng
kaadilan ekonomi hiji nagara ku pamihakan sareng pembelaan hak-hak rakyat
miskin.
Perilaku tuna-sosial anu nyirikeun sikep mentingkeun diri nyalira,
kalayan tegas dicela ku Allah SWT dina dawuhana-Na:
وَلَا يَحْسَبَنَّ الَّذِينَ يَبْخَلُونَ بِمَا آتَاهُمُ اللَّهُ مِنْ
فَضْلِهِ هُوَ خَيْرًا لَهُمْ بَلْ هُوَ شَرٌّ لَهُمْ سَيُطَوَّقُونَ مَا بَخِلُوا
بِهِ يَوْمَ الْقِيَامَةِ وَلِلَّهِ مِيرَاثُ السَّمَاوَاتِ وَالْأَرْضِ وَاللَّهُ
بِمَا تَعْمَلُونَ خَبِيرٌ
“Jeung poma ulah nyangka jalma-jalma anu koret ku harta anu ku
Allah dibikeun ka maranehna tina kurnia-Na, yen lampah kitu teh hade pikeun
maranehna. Saenyana sikep koret eta kacida goreng. Harta anu dikoretkeun ku
maranehna eta, bakal dikangkalungkeun dina pundukna engke dina poe kiamat.
Jeung milik Allah sagala warisan langit jeung bumi, jeung Allah maha uninga
kana naon rupa anu dipilampah ku maraneh” (ali Imran: 180).
Islam ngajarkeun, yen kabagjaan sajati bakal karaih nalika urang
mampu masrahkeun naon anu ku urang dipimilik ka jalma lian anu ngabutuhkeun.
Fakir miskin, budak yatim anu teu mibanda harta sarta jalma-jalma anu tingkat
ekonomina dihandapeun standar kacukupan anu jumlahna teu kinten ageungna di
negara urang, meryogikeun kaberpihakan sareng kapedulian ti pamarentah sareng
warga masyarakat anu sanesna. Numawi sakitu Rasulullah SAW parantos netepkeun
kawajiban zakat fitrah ka satiap muslim, sebagai simbol tina kapedulian sosial
sareng kaberpihakan ka kaum lemah:
عَنِ ابْنِ عَبَّاسٍ قَالَ فَرَضَ رَسُولُ اللَّهِ
-صلى الله عليه وسلم- زَكَاةَ الْفِطْرِ طُهْرَةً لِلصَّائِمِ مِنَ اللَّغْوِ
وَالرَّفَثِ وَطُعْمَةً لِلْمَسَاكِينِ فَمَنْ أَدَّاهَا قَبْلَ الصَّلاَةِ فَهِىَ
زَكَاةٌ مَقْبُولَةٌ وَمَنْ أَدَّاهَا بَعْدَ الصَّلاَةِ فَهِىَ صَدَقَةٌ مِنَ
الصَّدَقَاتِ
“Rasulullah SAW ngawajibkeun
zakat fitrah anu ngabersihkeun jalma shaum tina caritaan sia-sia jeung kotor,
oge anu jadi kadaharan pikeun jalma-jalma miskin. Jalma anu ngalaksanakeun
zakat fitrah samemeh shalat (‘id), maka eta jadi zakat anu ditarima, sedengkeun
anu ngalaksanakeunana sabada shalat (‘id), maka eta jadi sedekah diantara
sedekah-sedekah anu sejenna.” (HR Ibnu Majah).
Hadirin Ahli Jum’ah rahimakumullah.
Dina raraga nunaikeun zakat fitrah, sumangga urang
salurkeun kawajiban urang ieu ngalangkungan lembaga-lembaga anu tiasa
dipercanten ngalolana, sapertos UPZ DKM
(Unit Pengumpul Zakat DKM) anu memang tugas sadidintena ngatur sareng nasharufkeun
dana-dana umat. Potensi zakat, infak, shadaqah, sareng wakaf di negeri ieu antawis
100 dugi ka 217 trilyun rupiah dina sataun, sababaraaha kali lipet tina
anggaran Kementerian Pendidikan Nasional dina RAPBN 2011 anu ageungna 50
trilyun, subhanallah, dana anu henteu saalit, saupami tiasa digali sareng
diberdayakeun, tangtos kondisi ekonomi umat Islam bakal langkung sae.
بار ك الله لى ولكم فى القرآن العظيم ونفعنى وإياكم بما فيه
من الآيات والذكرالحكيم وتقبل منى ومنكم تلاوته إنه هو السميع العليم
الحمد لله رب
العالمين وبه نستعين على أمورالدنيا والدين والصلاة والسلام على أشرف الأنبياء
والمرسلين محمد وعلى آله وأصحابه أجمعين. أشهد أن لا إله إلا الله وحده لا شريك له
الملك الحق المبين وأشهد أن محمدا عبده ورسوله صادق الوعد الأمين. أللهم صل وسلم
على سيد المرسلين محمد وعلى آله وصحبه أجمعين. أما بعد, فيا عباد الله أوصينى نفسى
وإياكم بتقوى الله وطاعته لعلكم تفلحون وقال تعالى إن الله وملائكته يصلون على النبي ياأيها الذين آمنوا صلوا
عليه وسلموا تسليما.
أللهم صل وسلم على سيدنا محمد وعلى آله وصحبه أجمعين آمين: أللهم
اغفر للمسلمين والمسلمات والمؤمنين والمؤمنات الأحياء منهم والأموات, ربنا آتنا من
لدك رحمة وهيِّء لنا من أمرنا رشدا.
عباد الله , إنالله يأمر بالعدل والإحسان وإيتاء ذى القربى وينهى عن
الفحشاء والمنكر والبغي يعظكم لعلكم تذكرون أستغفرالله العظيم لى ولكم.
Artikel Lainnya:
0 comments:
Posting Komentar