 |
Sabtu, 29 Januari 2011
Kabohongan Publik
الحمد لله الذي بعث النبيين مبشرين ومنذرين أشهد أن لا إله إلا الله الملك الحق المبين وأشهد أن محمدا عبده ورسوله صادق الوعد الأمين. أللهم صل وسلم على سيد المرسلين محمد وعلى آله وصحبه أجمعين. أما بعد, فيا عباد الله اتقواالله حق تقاته ولا تموتن إلا وأنتم مسلون. يَا أَيُّهَا الَّذِينَ آَمَنُوا اتَّقُوا اللَّهَ وَكُونُوا مَعَ الصَّادِقِينَ
Ma’asyiral Muslimin Rahimakumullah…..
Allah SWT ngadawuh dina Surah At-Taubah ayat 119, sakumaha diaoskeun di awal khutbah nembe:
يَا أَيُّهَا الَّذِينَ آَمَنُوا اتَّقُوا اللَّهَ وَكُونُوا مَعَ الصَّادِقِينَ
“He jalma-jalma anu airman, kudu takwa aranjeun ka Allah, jeung kudu babarengan aranjeun jeung jalma-jalma anu bener”
Dina sababaraha dinten anu pengker ieu, kecap “bohong” lawan kecap “bener”, janten wacana anu sering diekspose ku media massa. Kantenan saupami kecap “bohong” ieu dirangkaikeun sareng kecap “publik” janten “kabohongan publik” anu ditujukeun ka nu ngagaduhan kakawasaan, tangtos nuansana janten “politis” sensitif tur tiasa ngahudangkeun amarah ti pihak anu dituduh ngalakukeunana. Wacana “kabohongan publik” anu ngawitanana dilontarkeun ku tokoh-tokoh lintas agama, ditilik tina sisi positif-husnudzzan, tiasa janten mangrupikeun kritik sareng “gerakan moral” dina raraga “amar ma’ruf nahyi munkar” ngemutan panguasa sangkan leres-leres nyepeng sareng ngajalankeun amanah anu dipercantenkeun ku rahayat ka anjeuna.
Bohong mangrupikeun salah sawios sifat moral anu dicela sanes wae ku norma nanging oge agama. Buktosna, jalmi anu sok ngabohong manehanana bakal moal tiasa dipercaya, moal dipikaresep, sarta dijauhan ku balarea. Nanging sok sanaos kitu, seueur jalmi anu milampah sareng ngabiasakeun padamelan bohong ieu kusabab aya desakan atanapi kapentingan sasaat pikeun ngaraih kauntungan material atanapi nyumputkeun kakurangan. Salah sawios ungkapan anu disarandekeun kana falsafah politik Machiavelli nguningakeun: “Lamun anjeun hayang sukses salaku pamingpin, atawa anjeun hayang meunang kauntungan boh kauntungan sacara ekonomis atawa politis, ngan hiji konci suksesna: ngabobong!”
Hadirin Rahimakumullah…,
Madzhab Machiavelli ieu tangtos sanes mangrupikeun hiji sandaran sareng cepengan anu sae kangge urang salaku umat Islam anu ngagaduhan Al-Qur’an sareng Sunnah. Falsafah ieu sarat ku nilai-nilai Immoralisme sareng Pragmatisme anu ngareksak kana tatanan moral sareng etika, kontradiktif sareng nilai-nilai luhur ajaran Islam. Jalmi anu nyepeng faham Machiavelli sapertos kieu tiasa janten anjeuna ngahalalkeun sagala cara demi ngahontal tujuanana, pinter ngamanipulasi sareng ngarekayasa data ku ngungkapkeun fakta anu henteu sesuai sareng anu sakedahna demi ngudag kauntungan. Hariwangna, saupami kabohongan anu dipilampahna eta aya sangkut pautna sareng kapentingan publik, maka dipastikeun bakal ngabalukarkeun kateupercantenan, gejolak sosial, tindakan anarkisme, sareng kasangsaraan masyarakat. Kumargi sakitu ngabohong kumaha wae bentukna boh anu aya sangkut pautna sareng kapentingan personal atanapi publik, sareng saha wae anu milampahna boh aparat atanapi rahayat, kalebet kana sifat destruktif sareng hiji kajahatan (dosa) anu kedah ditebihan ku umat Islam. Dina hadits Rasulullah SAW disebatkeun bohong sok ngagiring kana kajahatan (fujur), sedengken kajahatan sok ngagiring kana seuneu naraka:
فَإِنَّ الْكَذِبَ يَهْدِي إِلَى الْفُجُورِ وَإِنَّ الْفُجُورَ يَهْدِي إِلَى النَّارِ وَمَا يَزَالُ الرَّجُلُ يَكْذِبُ وَيَتَحَرَّى الْكَذِبَ حَتَّى يُكْتَبَ عِنْدَ اللَّهِ كَذَّابًا
“saestuna bohong nuduhkeun kana kajahatan (dosa) jeung saestuna kajahatan nuduhkeun kana naraka. Jeung hiji jalma henteu eureun-eureun ngabohong sarta tuluy-tuluyan ngabohong, sahingga dituliskeun di sandingeun Allah salaku jalma gede bohong”
Hadirin ahli Jum’ah anu miharep rahmat Allah,
Hiji muslim anu ngangken Muhammad SAW janten toladan hirupna, sakedahna ngagaduhan sifat jujur, bener sareng nebihan sifat bohong. Sifat jujur mangrupikeun sumber sagala kasaean di dunya, sarta janten sabab pikeun ngaraih kasaean di akherat nyaeta surga. Sedengken kabohongan mangrupikeun sumber sagala kajahatan di dunya. Pikeun anu ngalakukeunana janten sabab ancrub kana kasangsaraan di akherat nyaeta naraka. Kumargi sakitu, kajujuran kedah janten karakter dina kahirupan sangkan ngahasilkeun rupi-rupi kasaean di dunya sareng di akherat. Sangkan janten karakter, kajujuran kedah dipraktekkeun di mana wae, iraha wae, dina kondisi kumaha wae, sesuai sareng pitutur Nabi SAW. Kasauran al-Qusyaeri, kajujuran kedah diintegrasikeun dina ahwal, itikad sareng amal:
الصدق أن لا يكون في أحوالك شوب ولا في اعتقادك ريب ولا في أعمالك عيب
“Jujur nyaeta ulah aya anu nyampuran dina kondisi batin (ahwal) anjeun, ulah aya karaguan dina i’tikad anjeun sarta ulah aya cacad dina amal anjeun”.
Saupami hiji jalmi, masyarakat, atanapi bangsa ngagaduhan karakter tukang bohong, henteu jujur, tangtos bakal lahir rupi-rupi tindak kajahatan, sapertos dina bentuk praktek-praktek mafia pajak, mafia hukum sareng tindak pidana korupsi anu ngabalukarkeun kasangsaraan jalmi seueur. Saupami hal ieu leres-leres kajantenan, maka kantun ngantos kareksakan dina pola tatanan kahirupan dunya sareng kasangsaraan jaga di akherat. Na’udzu billah…..
............................................
الحمد لله الذي نحمده ونستعينه ونستغفره ونعوذ بالله من شرور أنفسنا وسيئات أعمالنا من يهد الله فلا مضل له ومن يضلل فلا هادي له. أشهد أن لا إله إلا الله وحده لا شريك له وأشهد أن محمدا عبده ورسوله لا نبي بعده. أللهم صل وسلم على رسول الله سيدنا محمد وعلى آله وصحبه ومن تبعه إلى يوم القيامه. أما بعد, فيا عباد الله أوصينى نفسى وإياكم بتقوى الله وطاعته لعلكم تفلحون وقال تعالى إن الله وملائكته يصلون على النبي ياأيها الذين آمنوا صلوا عليه وسلموا تسليما.
أللهم صل وسلم على سيدنا محمد وعلى آله وصحبه أجمعين آمين: أللهم اغفر للمسلمين والمسلمات والمؤمنين والمؤمنات الأحياء منهم والأموات, ربنا آتنا من لدك رحمة وهيِّء لنا من أمرنا رشدا.
أللهم صل وسلم على سيدنا محمد وعلى آله وصحبه أجمعين آمين: أللهم اغفر للمسلمين والمسلمات والمؤمنين والمؤمنات الأحياء منهم والأموات, ربنا آتنا من لدك رحمة وهيِّء لنا من أمرنا رشدا.
عباد الله , إنالله يأمر بالعدل والإحسان وإيتاء ذى القربى وينهى عن الفحشاء والمنكر والبغي يعظكم لعلكم تذكرون أستغفرالله العظيم لى ولكم.
Artikel Lainnya:
0 comments:
Posting Komentar