Kumpulan Catatan: Miemut Maulid Nabi

الحمد لله الذي أرسل رسوله بالهدى ودين الحق ليظهره على الدين كله ولو كره الكافرون. أشهد أن لاإله إلا الله وحده لاشرك له. وأشهد أن محمدا عبده ورسوله لا نبي بعده. اللهم صل وسلم على سيدنا محمد وعلى آله وأصحابه ومن والاه امابعد: فيامعاشر المسلمين رحمكم الله، إتقواالله حق تقاته ولا تموتن إلا وأنتم مسلمون. قال الله تعالى: لقد من الله على المؤمنين إذ بعث فيهم رسولا من أنفسهم يتلو عليهم آياته ويزكيهم ويعلمهم الكتاب والحكمة وإن كانوا من قبل لفي ضلال مبين

Ma’asyirol Muslimin Rohimakumulloh.

Rabi’ul Awwal mangrupikeun sasih anu ngagaduhan tempat istimewa dina hate kaum muslimin. Teu saalit diantara urang anu ngagaduhan pamaksadan-pamaksadan khusus sapertos syukuran pernikahan atanapi khitanan biasa diselenggarakeun dina sasih Rabi’ul Awwal. Nyakitu deui acara-acara pangaosan khusus dina raraga miemut kalahiran kangjeng Rosululloh SAW biasa dilaksanakeun dina sasih Rabi’ul Awwal. Dina basa Sunda sasih eta dikenal ku istilah sasih Mulud, kenging nyandak tina kecap “maulud’ atanapi “maulid” tina basa Arab anu hartosna “anu dilahirkeun” atanapi “kalahiran”. Dinamian kitu kumargi dina sasih ieu kaum muslimin diemutkeun deui kana peristiwa dilahirkeunana kangjeng Rosululloh SAW.

Kalahiran Rosululloh SAW tangtos mangrupikeun karunia kanggo jalmi anu iman. Anjeuna sanes sosok jalmi biasa, tapi jalmi anu pinuh ku sifat kasampurnaan, diutus ku Alloh pikeun nyalametkeun manusa tina jalan anu salah kana jalan anu bener ku macakeun ayat-ayat Alloh, ngabersihkeun jiwa manusa, ngajarkeun Kitab sareng Hikmah, sakumaha dawuhan Alloh SWT dina Surat Ali ‘Imron ayat 164:

لقد من الله على المؤمنين إذ بعث فيهم رسولا من أنفسهم يتلو عليهم آياته ويزكيهم ويعلمهم الكتاب والحكمة وإن كانوا من قبل لفي ضلال مبين

Saenyana Alloh geus maparin ni’mat ka kaom mu’minin karana Alloh geus ngutus hiji rosul ka maranehna ti bangsana sorangan, anu mangmacakeun ayat-ayat Alloh ka maranehna, jeung anu nyucikeun maranehna, jeung anu ngajarkeun kitab katut hikmah ka maranehna, padahal kaayaan maranehna samemehna aya dina kasasaran anu nyata.

Ibnu ‘Abbas masihan panafsiran kana lafadz آيات dina ayat anu diaoskeun nembe nyaeta al-Qur’an anu dilebetna aya parentah sareng larangan. يزكيهم hartosna Rosululloh ngabersihkeun jalmi iman tina syirik ku jalan nga-esa-keun Alloh, sareng nyucikeun tina dosa-dosa. Sedengkeun الحكمةmangrupikeun perkara-perkara halal sareng haram.

Dumasar kana ieu katerangan, Rosululloh parantos ageung jasana dina ngajelaskeun parentah-parentah Alloh anu kedah dijalankeun sareng larangan-larangan-Na anu kedah ditebihan sakumaha kaunggel dina al-Qur’an. Rosululloh ngajarkeun al-Qur’an anu janten pituduh umat manusa sareng ngajarkeun halal-haram. Anjeuna oge parantos ngabersihkeun kayakinan jalmi iman tina kamusyrikan sareng padamelan-padamelan dosa.

Kaom Muslimin anu miharep rohmat Alloh.

Rosululloh SAW mangrupikeun pribadi anu pinuh ku kamulyaan, kaagungan, kajujuran, sareng kaluhuran. Kaagungan anjeuna oge diangken ku salah sawios penulis buku non-muslim, Michael Hart anu nempatkeun Rosululloh dina posisi pertama diantara 100 tokoh dunia anu paling berpengaruh di muka bumi ieu. Nanging sok sanaos kitu, teu aya ucapan atanapi sikep Rosululloh anu ngindikasikeun anjeuna ngaraos agung atanapi ngagaduhan jasa dina sapanjang jumenengna. Anjeuna pribadi sederhana anu teu pernah takabur. Kasederahanaanana dibungkus ku katawadluan anu paling luhur. Malihan numutkeun pandangan anjeuna, sagala upaya anu kantos dijalankeunana dina raraga nanjeurkeun bebeneran sareng agama Alloh teu benten sareng hiji batu bata anu nyampurnakeun hiji wangunan. Anjeuna ngadawuh:

مثلي ومثل الانبياء قبلي كمثل رجل بنى بيتا فأحسنه وأجمله إلا موضع لبنة فى زواية من زواياه, فجعل الناس يطوفون به ويعجبون له وبقولون هلا وضعت هذه اللبنة؟ فأنا تلك اللبنة وأنا خاتم الأنبياء

Conto kaula jeung para nabi samemeh kaula, ibarat hiji jalma anu ngawangun gedong tepika dialus-alus jeung diendah-endah, iwalti di hiji juru aya tempat sabataeun anu teu disampurnakeun pagaweanana. Jalma-jalma anu ngurulingan eta wangunan pada-pada kagum nyaksian kaalusana. Maranehna nanyakeun, “Naha kunaon tempat sabatauen deui ieu teu direngsekeun pagaweanana?”. Tah kaula anu nyampurnakeun pagawean sa-batubataeun eta jeung kaula anu jadi panutup para nabi.

Hadirin kaom muslimin.

Ku hal sakitu, urang salaku kaom beriman anu ngangken turut sareng tumut ka anjeuna ngagaduhan kawajiban kanggo ngajalankeun ajaran-ajaran anjeuna, melakkeun sifat-sifat sareng akhlak anjeuna dina kahirupan sadidinten margi mung anjeuna anu janten model sareng toladan anu paling sampurna anu kantos aya di dunya ieu. Dawuhan Alloh SWT dina Surat al-Ahzab ayat 21 netelakeun dina diri Rosululloh aya conto anu sae pikeun jalmi-jalmi anu miharep rohmat Alloh:

لقد كان لكم في رسول الله أسوة حسنة لمن كان يرجو الله واليوم الآخر وذكر الله كثيرا

Saestuna pikeun maraneh aya conto anu hade di Rosululloh, nyaeta pikeun jalma-jalma anu miharep Alloh jeung poe akhir, tur anu loba aringetna ka Alloh.

Kumargi sakitu, mudah-mudahan urang salamina dipaparinan kakiatan ku Alloh SWT kanggo senantiasa ngadukung sareng satia kana ajaran-ajaran Rosululloh, malahmandar urang kenging pangangken salaku umat anjeuna jaga di yaumil akhir.

بارك الله لى ولكم فى القرآن العظيم ونفعنى وإياكم بما فيه من الآيات والذكرالحكيم وتقبل منى ومنكم تلاوته إنه هو السميع العليم

----------------------------------

الحمد لله الذي نحمده ونستعينه ونستغفره ونعوذ بالله من شرور أنفسنا وسيئات أعمالنا من يهد الله فلا مضل له ومن يضلل فلا هادي له. أشهد أن لا إله إلا الله وأشهد أن محمدا رسول الله. أللهم صل وسلم على رسول الله سيدنا محمد وعلى آله وصحبه ومن تبعه إلى يوم القيامه. أما بعد, فيا عباد الله أوصينى نفسى وإياكم بتقوى الله وطاعته لعلكم تفلحون وقال تعالى إن الله وملائكته يصلون على النبي ياأيها الذين آمنوا صلوا عليه وسلموا تسليما.

أللهم صل وسلم وبارك عليه آمين: أللهم اغفر للمسلمين والمسلمات والمؤمنين والمؤمنات الأحياء منهم والأموات, ربنا آمنا بما أنزلت واتبعنا الرسول فاكتبنا مع الشاهدين. ربنا آتنا من لدك رحمة وهيِّء لنا من أمرنا رشدا.

عباد الله , إنالله يأمر بالعدل والإحسان وإيتاء ذى القربى وينهى عن الفحشاء والمنكر والبغي يعظكم لعلكم تذكرون أستغفرالله العظيم لى ولكم.

Kumpulan Catatan

Peta Situs

Sering Dibaca

Miemut Maulid Nabi

Artikel Lainnya:

0 comments:

Posting Komentar